كل واحد فينا فكر ازاي نقدر نصلح بلدنا بعد نجاح الثورة المبدئي اللي وصلناله و بقول مبدئي عشان لسه قدامنا مشوار طويل لحد ما نقول ثورتنا نجحت 100% و مصر وقفت على رجليها تاني....المهم ان احنا -شباب و بنات الزقازيق- قررنا بندأ بأبسط حاجة ممكن اي حد يعملها و هي حملة نظافة شاملة لكل الشوارع و فعلا جمعنا بعض عن طريق event عال facebook و كان العدد كبير قوي....و نزلنا اول يوم و بدأنا بحي القومية و قبل ما نمشي كلنت الشوارع بتبرق و استمرينا على كده كذا يوم و بعدين قررنا ندهن الارصفة و عواميد النور و نزرع شجر و ورد و نخلي الشوارع شكلها نضيف و فعلا عملنا ده....
كنا بنقسم نفسنا مجموعات...مجموعة تكنس الرصيف كويس جدا و مجموعة تضرب البوية و مجموعة تبدأ بالدهان و في خلال اسبوع كنا خلصنا تقريبا 3 احياء نضافة و دهان......الشباب و البنات فعلا كان شكلهم يفرح و كانوا من كل مراحل التعليم و الكليات...اللي في ثانوي و اللي في اعدادي و حتى الاطفال كانوا بيساعدونا...شباب من كليات طب و هندسة و تجارة و اداب و ناس مخلصين و حتى في اهالي نزلوا و ساعدونا.....
في بداية طريقنا واجهنا شوية صعوبات زي اننا لازم ناخد اذن من الحي و المحافظ قبل ما ندهن اي حاجة و كمان الفلوس اللي كنا بنجمعها من بعض و نجيب بيها الادوات مكنتش دايما بتكفي لكن لقينا support مش طبيعي من المحافظ اللي قرر تفعيل قرار تحديد غرامة من 100 الى 200 جنيه على اي حد هيرمي زبالة و وفر لنا سلات ادام كل محل و مجلس المدينة و رئيس الحي و الاهالي ....
المحافظ و رئيس الحي خصصولنا عربيات تلم كل الزبالة و التراب اللي لمناهم و كان رئيس حي تاني معنا خطوة بخطوة و حتى نزل معنا الشارع في بعض الايام....و الاهالي كانوا فرحانين بينا قوي و اتبرعوا بالبوية و بالفلوس و حتى كانوا بيوزعوا علينا عصير و مية.....
اللي نظم الevent ده كانت بنت اسمها سالي و بعد شوية انضم ليها اسلام و كريم و امير و لولا تنظيم الناس دي و اصرارهم مكناش اتجمعنا و لا اشتغلنا بالنظام ده.....
كانت ايام صعبة قوي و كنا بننزل من 7 الصبح ل 7 المغرب....كان ارهاق مش طبيعي لكن كل ده راح بعد ما شوفنا شكل الشارع و بعد دعوات الناس لينا و فرحتهم بينا و بعد ما اثبتنا للعالم كله ان احنا مش شباب سيس .
و في الاخر عايزة اولا اشكر كل الناس اللي ساعدونا و وقفوا جمبنا...
المحافظ ، رئيس حي تاني ، د/ سها مكي ، رئيس جمعية رسالة في الزقازيق محمود ياسر و صاحب هايبر ماركت الزقازيق أ- مدحت دسوقي ، و كل محلات الدهانات و الصيدليات و كل اهالي القومية و فلل الجامعة و حي السلام اللي ساعدونا .
ثانيا عايزة اقول لكل الناس عشان بلدنا تبقى احلى لازم نحافظ عليها و نبطل سلبية و فوضى و كل واحد يبدأ بنفسه...لازم نبطل كلمة و انا ماليييييييييييييييييييييي........مصر مش هتعلى غير بينا.
ليست هناك تعليقات:
إرسال تعليق