العنوسة داء العصر...
لابد من ايجاد حل لهذه المشكلة الخطيرة....
الشباب مش عايز يتجوز فالبنات بتعنس....
ياعيني يا بنتي انتي عندك 22 سنه و لسة مفيش حاجة..!!
أكيد كلنا سمعنا عالاقل جملة واحدة من الجمل السخيفة دي...خصوصا في الافراح او المناسبات اللي بتتجمع فيها ستات العيلة و فجأة تلاقي نفسك يا حرام متحاوطة بعواجيز الفرح اللي بيتحسروا عليكي عشان تميتي ال22 و لسة مش مخطوبة و يحسسوكي ان خلاص القطر فاتك....
بالرغم من اننا في سنة 2010 و المفروض اننا بنتقدم ( المفروض يعني ) لكن لسة عقلية الناس بالنسة لموضوع الجواز و العنوسة زي ما هي متغيرتش...في نسبة قليلة تفكيرها مختلف لكن الاغلبية بيشوفوا ان البنت لازم تكون مخطوبة على 21 او 22 بالكتير عشان تتجوز عال 23 و تخلف عال 24 و كأنهم متأكدين ان الحياة هتمشي زي ما هما مخططين....
في بنات بتخضع و بتقول ان البنت مصيرها للجواز في الاخر و بنات تانية مبتتنازلش عن حقها في الحياة و الحب...النوع الاول بينفذ رغبة اهله و الحياة بتمشي في روتين سخيف و فجأة كل الايام تبقى شبه بعض و المشكلة ان الال دايما بيقولوا ان الحب بيجي بعد الجزاز مع ان ده غلط جدا...ما هو لو مجاش قبل الجواز في فترة الخطوبة اللي المفروض انها احلى فترة هيجي ازاي بعد الجواز و البيت و المسئولية و الاطفال...بيكون تعود و ده اكبر غلط...النوع ده من الجوازات يا بينتهي بالطلاق يا البنت بتقول اهي عيشة و السلام و بتفضل زي اللي بتلف في ساقية و ميكونش لها حياة...
النوع التاني من البنات بقه و اللي انا ولا فخر منه مبيقولش اه ابدا لأن الجواز في حد ذاته مش هدف...ما هو لو مش هكون مبسوطة يبقى فاكسسسس..مش هعيش و السلام زي ال 70 الف واحدة اللي مش مميزين..مش هتجوز الا عن حب و اقتناع...طبعا كل ده مبيعديش كده...!!
النوع ده من البنات بيتعرض لضغط نفسي رهيب من اهله...بيستخدموا طريقة ( هقرفك لحد ما تقولي حقي برقبتي ) و يستخدم الاهل كروت الارهاب اللي بتبدأ بمفيش...( مفيش خروج _ مفيش جامعة _ مفيش شغل .....) و كل حاجة انتي بتحبيها هيكون قبلها مفيش ده طبعا غير التلقيح بالكلام عليكي و ان فلانه اتجوزت و علانه خلفت و انتي لسة قاعدلنا و شكلك بقه وحش ده كل بنات العيلة اتجوزوا و انتي لسة و نفسي افرح بيكي و اشيل ولادك قبل ما موت و ندخل في سكة امينة رزق و يوسف وهبي و في الاخر في نسبة بتوافق على اي عريس لمجرد انهم يخلصوا من الزن و القهر و نسبة تانية بتتمسك بحقها الطبيعي في الحياة...ما هو مينفعش افرح اهلي بالفستان الابيض و الطرحة و اتعس نفسي و اظلم انسان معايا...مينفعش ابني حياتي على اساس غلط وارد جدا اقابل حد و احبه بعد ما اتجوز و وارد جدا اني انفصل او ان اي حاجة تحصل و في الاخر اهلي مش هينفعوني...انا اللي هشيل على دماغي....
للاسف العنوسة في سنة 2010 بتبدأ من سن 23 و بالرغم من ان العالم حوالينا عند الناس اللي بتفهم بيشوفوا ان المفروض السن المناسب للجواز بيبدأ من 28 عشان البنت تكون ناضجة بالقدر الكافي و تقدر تتحمل المسئولية عشان الجواز مش الفستان و الطرحة و الفرح....الجواز مسئولية كبيرة و حياة ادامنا.....
أنا مكنتش أعرف أن الأهل بيبهدلوا البنات كدا
ردحذفالحمدلله أني طلعت ولد, وأتمنى أن الناس تفكيرها يختلف