حبينا بعض قوي....كنا زمايل في الجامعة و برغم ان كل واحد فينا كان في كلية لكن كنا مع بعض تقريبا طول الوقت...كنت بصحى كل يوم و انا مستنية اني اشوفه و مش هكون ببالغ لو قلتلكوا اني كنت بروح الجامعة و بتأنتك بس عشانه مانا كليتي نظري فبحضر اخر اسبوعين و بس....
هو بقا كان في كلية طب لكن ده عمره ما كان سبب لانه يكون مشغول عني غير ايام الامتحانات طبعا...كنا صحاب قوي قبل ما نحب بعض...كنا بنغير على بعض موت و هو كان هيجنني بتقله...يعني بيغير و بيتجنن لما بكلم اي ولد زميلي لكن مبيقولش حاجة و في يوم ال valentine's كان في عرض مكالمات و لقيته بيكلمني و فضلنا نرغي كتير و بعدها بكام يوم خرجنا مع صحابنا و قاللي بحبك...قلتله من غير تفكير و انا كمان و ارتبطنا...
عشنا مع بعض احلى ايام في حياتنا....كان احن عليا من اهلي و بيحس بيا قوي...روحنا اماكن كتير مع بعض و عشت معاه اول كل حاجة....اول لمسة ايد....اول خروجة مع ولد لوحدي....اول مرة ادخل سينما من غير اخويا...كان معوضني عن كل الدنيا و قبل ما نكمل سنة ابتدب المشاكل تدخل بينا و كان اغلبها بسبب الغيرة اصلي كنت مجنونة بيه و مبطقش حد يبصله و من حظي بقا انه كان من اجمد الناس في الجامعة شكلا و موضوعا .....المهم ان وقتها كانت مامته مش عايزاني الى حد كبير يمكن مقلتلوش كده لكن كل الدلالات كانت بتقول و انا بقا كرامتي نقحت عليا و عملت فيها بتاعة و..............
بكل الغباء و العند و الكبرباء المتخلف سبته....سبت حبيبي في امتحاناته و قررت اني ابعد خالص و اثبتله اني هعيش و هكون من غيره مانا انسانة مستقلة و بعتمد على نفسي و كل شعارات حرية المرأة دي....و فعلا عشت و بقيت و اعتمدت على نفسي و قويت...قلبي جمد بعده و كرهت كل حاجة....
يمكن من وقت للتاني كنا بنتكلم و نطمن على بعض و نتحجج لكن مرجعناش و بعد سنتين تقريبا خطب البنت اللي انا كنت متأكده اني هيخطبها...ما هي قريبته بقا...لما عرفت اتصدمت و حسيت بالأرض بتتهز تحت رجلي لكن استحملت و بعد شهور اتكلمنا تاني و قلنا ياريت اللي جرى ما كان و قاللي لو وافقتي ممكن نتجوز بعد مدة لكن طبعا رفضت اصل ازاي هكون زوجة تانية حتى لو انا الاولى في قلبه هكون التانية دايما في حياته...
و اتجوز.....حبيبي اللي عشت معاه احلى سنيني خلاص مبقاش ليا وش....مش هحكي كنت عاملة ازاي و لا اليوم ده من اوله كان ازاي صعب ما هو عدى...دايما بقول كان يوم و عدى...كنت بدعي مشوفوش معاها في اي مكان لكن في نفس الوقت كان نفسي اشوفه قوي و فعلا بعد جوازه بسبع شهور شفته و كلمني و عرفت ان مراته هتجيب بنوته بعد شهرين....
حسيت ان حياتي وقفت و نفسي بقا تقيل و مش شايفة غير شريط سينما بيعدي قدامي في ايامنا كلها....يمكن اللي صبرني احساس انه محبهاش...عنيه بتقول اني لسه في دمه زي ما هو هيفضل في دمي....مهما بعدنا و مهما قسيت عليه او قسي عليا هنفضل في دم بعض...
انا محستش بغلطتي غير بعض فوات الاوان...خلاااااااااااص مينفعش حتى اصلحها و الحياة مش فيلم هينتهي نهاية سعيدة يعني اللي بيروح صعب قوي يرجع.....انا مدافعتش عن حبي و ضيعته...اوعوا تعملوا زيي...و الا هتعيشوا طول حياتكوا ندمانين...الدنيا مش مستاهلة زعل و نكد...لو بتحبوا بعض حاربوا عشان الحب ده حتى لو هتحاربوا الدنيا كلها......
ليست هناك تعليقات:
إرسال تعليق