· " انت تفهم ايه في الدنيا و لا تعرف ايه عن الحياة"
· " انتي تافهة و دماغك صغيرة...هتكبري امتى بقه"
· " انتوا جيل مش فاهم حاجة...انتوا جيل بايظ...."
كام مرة سمعت الجملة دي من باباك او مامتك او اي حد كبير لمجرد انه اختلف معاك في الرأي....أكيد كتير قوي.... احنا الجيل اللي اتولد من سنة 80 لسنة 90...اللي دايما الكبار او على الاقل 90% منهم بيطلعونا غلط...عيال و مش فاهمين حاجة...عايزين كسر دماغنا.....انا مثلا اهلي شايفني متمردة و عاملة زي الفرس الجامح لكن اللي هم مش شايفينه ان تمردي مش عليهم....تمردي على القيود اللي بيفرضوها عليا بحكم المجتمع و العادات و التقاليد...مش قادرين يفهموا ان العادات و التقاليد دي ممكن تتغير لأنها مش منزلة من السما...دي حاجات اتفرضت علينا من اللي قبلنا و احنا بنغمض عنينا و نتحدف وراهم و بس من غير تفكير في العادات دي صح و لا غلط....
الناس في كل الدنيا بتحاول تتقدم و احنا لسة زي ما احنا دافنين راسنا في الرمل و مبنتحركش...شايفين البنت مصيرها لبيتها و جوزها و مش مهم احلامها و طموحها...عشان هي بنت لازم تعمل اللي يتقالها عشان الكبار فاهمين و هي لأ...مع ان البنت لو اتقفل عليها 1000 باب و هي عايزة تعمل حاجة هتعملها...اللي بيخليها متغلطش اخلاقها مش القيود ابدا....يبقى شوية ثقة و مساحة حرية هيحلو المشكلة...مبطلبش من الاهل يسيبوا بناتهم كده من غير ضبط لكن بطلب مساحة حرية عشان نجرب...ما هو عشان نتعلم لازم نجرب و عشان نفهم لازم نحتك بالناس و عشان نعيش صح لازم يكون لينا حق اختيار الطريق....
اول مرة بقه أسمع حد كبير له رأي مختلف بيقول علينا جيل واقع...دكتور بيدرسلي في الجامعة كان رأيه ان "احنا جيل اتظلم و مخدش حقه...جيل واقع ما بين زمن كانت كل حاجة فيه حلوة و زمن ملخبط...واقعين ما بين جيل كان عايش حياته و جيل واخد حقه....عاملين زي اللي رقصوا عالسلم "...فكرت كتير في كلامه و لقيت انه مش صح بس كمان مش غلط...يمكن احنا فعلا جينا بعد زمن كانت كل حاجه فيه حلوة و كان الجيل اللي قبلنا عايش حياته و اه الجيل اللي بعدنا واخد حقه و عارف اكتر مننا لكن كمان جيلنا ليه حلاوته...يعني احنا اول جيل يستخدم الانترنت و اول جيل يكتب في كلمتنا و اول جيل يمسك موبايل....اه مش واخدين حقنا كله و اه مظلومين من اهالينا لكن برضه احنا جيل جامد قوي.....يمكن نكون فعلا وقعنا بين فترتين عكس بعض و تهنا في النص بينهم لكن اغلبنا بيلاقي طريقه....بشوية صبر و تفكير و مساعدة من اهالينا ( مساحة حرية يعني) هنلاقي الطريق....
بابا..ماما....انا مش هعيش بطريقتكوا...بحبكوا قوي لكن مقدرش اعيش حياة من اختيار حد غيري حتى لو الحد ده اقرب الناس ليا...من فضلكوا ادوني حقي في الاختيار...مش عايزة غير شوية ثقة في اني اقدر اتعامل مع الامور و اتحمل المسئولية و مساحة حرية عشان اعمل الحاجة اللي بحبها..اسفة لكن مش هقدر اغمض عيوني و اتحدف.
أنا شايف أننا جيل مستهدف...
ردحذفيعني بالنسبة للأولاد: جيلنا أنتشرت فاجئة فيه الكافيهات والشيشة والسجاير بشكل مرعب و الموضوع وصل للبنات ألى حد كبير
أنعدمت فيه الصالونات الثقافية و المحافل الأدبية في نفس الوقت اللي أنتشرت فيه محلات البلاي ستيشن بشكل مروع
حتى الصفات الشخصية عندنا أتغيرت , الناس بقت تافهة أووووووي. ونسبة الشباب السيس حققت معدلات خارقة للطبيعة
بالنسبة للبنات: أنا معنديش فكرة أوي لأني مش بنت D:
بس اللي لمسته أن معدل التفاهة عالي برده وظاهرة عرض الأزياء اللي بيحصل كل خميس في الجامعات والشوارع مظهرتش ألا في جيلنا, تيجي تحللي الموقف تلاقي فعلا الأولاد بيقفوا على جنب الشارع يتفرجوا على البنات اللي ماشية في نص الشارع , يعني عرض أزياء ضيقة فعلا
ممكن تشوفي الموضوع من زاوية أن الأهالي متابعين ده كله بجانب التدني الحاد في المستوى الثقافي وده اللي أدى أنهم ميثقوش فينا.
أنا مبدافعش عنهم ,بالعكس ده أنا بدينهم لغياب دورهم في التوجيه ومش قصدي التحكم في فرق بينهم.
Adios~