الحياة....تلك المتاهة التي نعيش فيها و ننتقل عن طريق قطار يمشي على قضيب من الذكريات بعضها سعيد و بعضها يجعلنا نبكي....في هذا القطار جميع الركاب في بحث مستمر عن ذلك الأمل الذي يجعلنا......ايه الكلام المجعلص ده....؟؟!
باختصار عايزة أقول اننا دايماً في توهان مستمر و بندّور على حاجة تحلينا عايزين نكمل....حاجة تخلينا عايزين نتغير للأحسن و الحاجة دي دايماً بيكون ليها علاقة بالداء المهبب اللي اسمه الحب...و رغم عدم اقتناع بعض الناس بده لكن لو فكرنا ثواني هنلاقي ان الحب هو اللي بيدينا الدفعة الي بتخلينا عايزين نكون أحسن....و انا عن نفسي بأعلن و من مكاني هذا ان الحب هو اللي هيخليني أحسن من احسن حد في الدنيا....أيون....تلك هي الحقيقة....بس ازاي و فارس أحلامي عايش في غيبوبة عدم الاستقرار.....خلوني أحكيلكوا شوية....
انا بنوتة كل حلمي اني أحب في أجمل قصة حب...نتخانق و نتصالح...نتناقر و نغلس على بعض...يقوللي وحشتيني و أتكسف....و كل الحاجات العظيمة دي....عايزه حبيبي يكون آخر وش أشوفه قبل مانام....و أصحى على صوته المزعج و هو بيقوللي قومي اعمليلي الفطاااااااار عايز أروح الشغل....و بمنتهى الوقاحة أرد عليه مباشرة من تحت اللحاف الفايبر المعتبر ماتروح تفطر عند مامتك ايه الغلاسة دي....؟ و بعدها تتحول المناقشة لحرب مخدات أو ماتش بوكس....مش مهم...المهم انو في الاخر هنتصالح في لمح البصر و نفضل نضحك و برضه هيروح يفطر عند مامته.....بس ازاي كل ده هيحصل...؟؟
ازاي هحقق أهم حلم في حياتي و الاستاذ مش معايا....ليه مش معايا...؟؟؟سؤال وجيه برضه....مش معايا عشان حاسس بعدم استقرار و ده كل اللي انا أعرفه....طب متحكيلي...خليني أحس اني معاك...اني جمبك....مش عايزه أكون حبيبتك و انت تمام و مبسوط بس....أنا عايزه أكون معاك دايماّ...لما تكون مش مستقر و لما تكون زعلان و لنا تكون مضايق....احنا بنحب عشان نكون جنب بعض في الحلو و في الوحش....نساعد بعض و نستحمل بعض...انت محتاجلي زي مانا محتاجاك....متعاندش....وجودنا مع بعض هيقوينا مش هيظلمنا زي مانت فاكر....ارحمني بأه و بلاش جنان و بطل الجملة الفاكسة بتاعة مش عايز أظلمك معايا لحسن بدأت أشك انك عايز تملص....لو مش حبب تخلع قول....هتموت بس ده ميمنعش انك لازم تقول....انت فارس أحلامي بس قررت أقولك على ايدك المحطة الجاية....أيون...نزلني من القطر ده...أنا قررت أخد موقف و هقولّك بأسلوب شديد اللهجة اني هبعد عنك....بحبك و بمووووت فيك آه لكن هبعد عنك عشان لازم تعرف قيمة حبنا في حياتك....هبعد عنك و انا بتعذب و ربي عالم بس مفيش مفر....استنفذت معاك كل الطرق...يمكن بعدي عنك يخليك تعرف انا أد ايه بحبك....بس لو الطريقة دي كمان مجبتش نتيجة مش هيكون عندي حل غير سم الفيران....
عايزة حبيبي اللي بيحضني بعنيه الحلوين لما بشوفه يرجعلي تاني....ياواد دي عنيك فاضحاك...كلها حنيّة و حب و طيبة....ارحم نفسك بأه و اعقل كده عشان انا قدرك المهبب...بحبك أوي ولاهي...
ليست هناك تعليقات:
إرسال تعليق